ក្រសួងវប្បធម៌កម្ពុជា និងចិន បានកំណត់យកថ្ងៃទី១៤ ខែមករា ឆ្នាំ២០២៤ ខាងមុខ ជាព្រឹត្តិការណ៍ឆ្នាំនៃការផ្លាស់ប្ដូរប្រជាជន និងប្រជាជននៃប្រទេសទាំងពីរ

0
502

ភ្នំពេញ៖ យោងតាមការលើកឡើងរបស់លោក ជុក ជំនោ អគ្គនាយកនៃអគ្គនាយកដ្ឋានអភិវឌ្ឍន៍ផលិតផល នៃក្រសួងទេសចរណ៍បានបញ្ជាក់ថា នៅឆ្នាំ២០២៤ ខាងមុននេះ រាជរដ្ឋាភិបាលនៃប្រទេសទាំងពីរ កម្ពុជា និងចិន បានកំណត់នៃការគោរពពិធីនេះជាសំខាន់នេះ។ ដូច្នេះ ក្រុមការងារនៃក្រសួងវប្បធម៌ និងទេសចរចិន ព្រមទាំងស្ថាប័នពាក់ព័ន្ធកម្ពុជា បានជួបជុំពិភាក្សាគ្នា ត្រៀមបើកព្រឹត្ដិការណ៍នេះឱ្យបានទូលំទូលាយ ដោយអាចឱ្យអ្នកទស្សនាពីការសម្ដែងសិល្បៈរួមគ្នានៅតំបន់អង្គរ ខណៈដែលព្រឹត្ដិការណ៍នេះ ធ្វើឡើងជាផ្លូវការលើកទីមួយ ក្រោយពីបញ្ចប់វិបត្ដិជំងឺកូវី១៩។

បន្ទាប់ពីមានកិច្ចពិភាក្សាមួយរវាងក្រសួងវប្បធម៌ និងវិចិត្រសិល្បៈរបស់កម្ពុជា និងក្រសួងវប្បធម៌របស់ប្រទេសចិន នៅខេត្តសៀមរាប កាលថ្ងៃទី២១ ខែធ្នូ ឆ្នាំ២០២៣ ក្នុងការត្រៀមបើកព្រឹត្ដិការណ៍ឆ្នាំនៃការផ្លាប្ដូរប្រជាជន និងប្រជាជនរវាងប្រទេសទាំងពីរ ដែលធ្វើឡើងនៅតំបន់អង្គរវត្ដនោះ ក្រសួងទាំងពីរ បានកំណត់យកថ្ងៃទី១៤ ខែមករា ឆ្នាំ២០២៤ ខាងមុខនេះ ជាព្រឹត្ដិការណ៍ឆ្នាំនៃការផ្លាស់ប្ដូរប្រជាជន និងប្រជាជនរវាងប្រទេសកម្ពុជា និងប្រទេសចិន។ នេះបើតាមការឲ្យដឹងពីលោក ជុក ជំនោ។

លោកអគ្គនាយករូបនេះ បានលើកឡើងថា ព្រឹត្ដិការណ៍នេះ នឹងមានវត្តមានសិល្បករល្បីៗមកពីប្រទេសចិន និងកម្ពុជា សម្ដែងសិល្បៈវប្បធម៌រួមគ្នា ដើម្បីបង្កើតចំណងមិត្ដភាពប្រទេសទាំងពីរ ជាពិសេសធ្វើយ៉ាងណាឱ្យមានការទាក់ទាញអ្នកទេសចរចិន មកទស្សនាប្រទេសកម្ពុជាឱ្យកាន់តែច្រើនជាបន្ដបន្ទាប់ទៀត។ លោក បន្តថា នៅក្នុងព្រឹត្ដិការណ៍នេះ មានគណៈប្រតិភូចិនប្រមាណ ១ពាន់នាក់ នឹងចូលរួមទស្សនា និងក្រុមសិល្បៈករនៃប្រទេសចិនប្រមាណ ១០០នាក់ ព្រមទាំងសិល្បៈករខ្មែរជាច្រើននាក់ផងដែរ ហើយក្រោយពីបញ្ចាប់ព្រឹត្ដិការណ៍នេះ ប្រទេសទាំងពីរ នៅតែបន្ដរួមគ្នាផ្សព្វផ្សាយគោលដៅទេសចរណ៍អង្គរឱ្យកាន់តែច្រើននៅក្នុងឆ្នាំ២០២៤នេះ។

លោក បានអះអាងថា ព្រឹត្ដិការណ៍នេះ មិនត្រឹមតែទាក់ទាញអ្នកទេសចរចិនមកកាន់ទីផ្សារកម្ពុជាប៉ុណ្ណោះទេ ថែមទាំងបានរឹតចំណងមិត្ដភាពប្រជាជន និងប្រជាជន វប្បធម៌ អរិយធម៌ ប្រពៃណីនៃប្រទេសទាំងពីរថែមមួយកម្រិតទៀត ហើយព្រឹត្ដិការណ៍នេះ នឹងបើកទស្សនាដោយទូលាយ។

គួររំលឹកថា ក្រសួងវប្បធម៌របស់កម្ពុជា និងចិន បានកំណត់យកថ្ងៃទី១៤ ខែមករា ឆ្នាំ២០២៤ ខាងមុខ ជាព្រឹត្តិការណ៍ឆ្នាំនៃការផ្លាស់ប្ដូរប្រជាជន និងប្រជាជននៃប្រទេសទាំងពីរ កម្ពុជា និងចិន៕