ក្រុមបាល់ទាត់ហ្វូតសាលកម្ពុជាត្រូវប៉ះអ៉ីរ៉ាក់ ក្នុងព្រឹត្តិការណ៏ពានរង្វាន់ AFC Futsal Asian Cup 2024 វេលាម៉ោង៥ល្ងាច ថ្ងៃទី៩ ខែតុលា ឆ្នាំ២០២៣។
នេះជាការប្រកួតលើកទី២ក្នុងពូល G របស់ក្រុមកម្ពុជា ក្រោយការប្រកួតទី១ចាញ់អ៊ូបេគីស្ថាន ដោយលទ្ធផល ៦-១។ ស្របពេល អ៉ីរ៉ាក់ បានយកឈ្នះលើក្រុមអាស៊ាន ម៉ាឡេស៊ី ដោយលទ្ធផល ២-១។ ការប្រកួតជាមួយគ្នានេះ អ៊ូបេគីស្ថាន ប៉ះ ម៉ាឡេស៊ី។
ក្នុងព្រឹត្តិការណ៍ហ្វូតសាលអាស៊ីនេះ កាលពីឆ្នាំ២០០៤ ក្រុមកម្ពុជាបានបង្ហាញខ្លួននៅវគ្គសន្សំពិន្ទុក្នុងពូលជាលើកដំបូង ដោយឆ្លងកាត់ការប្រកួត៤លើក ឈ្នះ១ និងចាញ់៣។
អ៉ីរ៉ាក់នឹងកាន់តែធ្វើឲ្យកម្ពុជាធ្វើការងារធ្ងន់ ដោយសារពួកគេមានបទពិសោធច្រើនក្នុងការប្រកួត AFC Futsal Asian Cup។ កំណត់ត្រាល្អបំផុតកាលពីឆ្នាំ២០១៨ អ៉ីរ៉ាក់ ទទួលចំណាត់ថ្នាក់លេង៤ ក្រោយចាញ់អ៊ូបេគីស្ថានក្នុងបាល់ពិន័យ១១ម៉ែត្រដោយលទ្ធផល ១-២ ក្រោយស្មើគ្នា ៤-៤។
សម្រាប់ក្រុមបាល់ទាត់ហ្វូតសាលជម្រើសជាតិកម្ពុជា ស្ថិតនៅក្នុងពូល G ជាមួយម្ចាស់ផ្ទះអ៊ូបេគីស្ថាន, អ៊ីរ៉ាក់ និងម៉ាឡេស៊ី ក្នុងការប្រកួតជើងឯកប្រចាំទ្វីបអាស៊ី AFC Futsal Asian Cup 2024 ដែលចាប់ផ្ដើមចាប់ពីថ្ងៃទី៧ ដល់ថ្ងៃទី១១ ខែតុលា ឆ្នាំ២០២៣។
គួរបញ្ជាក់ផងដែរថា ព្រឹត្តិការណ៍ ប្រកួតជើងឯកប្រចាំទ្វីបអាស៊ី AFC Futsal Asian Cup 2024 ឆ្នាំនេះដោយក្រុមចូលរួមចំនួន ៣១ ត្រូវចាប់ចូលតាមពូលនីមួយៗ ដើម្បីប្រកួតជម្រុះ ស្វែងរកក្រុមខ្លាំងចំនួន ១៦ឡើងទៅជុំបន្តស្វែងរកជើងឯក។ពានរង្វាន់នេះធ្វើឡើងរាល់២ឆ្នាំម្តងគិតចាប់តាំងពីឆ្នាំ១៩៩៩ មកម៉្លេះ ដោយក្រុមជប៉ុន ជាម្ចាស់ជើងឯកឆ្នាំចាស់ក្នុងឆ្នាំ២០២២ ដែលប្រទេសគុយវ៉ែត ជាម្ចាស់ផ្ទះ ស្របពេលដែលក្រុមអ៊ីរ៉ង់ ក្រុមឈ្នះជើងឯកច្រើនជាងគេរហូតដល់ទៅ១២សម័យកាល៕
