រដ្ឋមន្ត្រីទេសចរណ៍៖ និស្សិតអាហារូបករណ៍រដ្ឋាភិបាលនូវែលសេឡង់ធ្វើជាទូតនាំសារផ្សព្វផ្សាយពីវប្បធម៌កម្ពុជា

0
536

ភ្នំពេញ៖ រដ្ឋមន្ត្រីក្រសួងទេសចរណ៍ ឯកឧត្តម សុខ សូកេន បានផ្ដាំផ្ញើដល់ក្រុមនិស្សិតកម្ពុជាដែលទទួលបានអាហារូបករណ៍ពីរដ្ឋាភិបាលនូវែលសេឡង់ ឱ្យធ្វើជាទូតនាំសារផ្សព្វផ្សាយពីវប្បធម៌ អរិយធម៌ និងសក្តានុពលវិស័យទេសចរណ៍កម្ពុជា នៅពេលបានទៅសិក្សានៅប្រទេសអភិវឌ្ឍន៍មួយនេះ។ ការផ្ដាំផ្ញើនេះធ្វើឡើងក្នុងឱកាសដែលឯកឧត្តមរដ្ឋមន្ត្រី អនុញ្ញាតឱ្យសិស្សនិស្សិតអាហារូបករណ៍រដ្ឋាភិបាលនូវែលសេឡង់ថ្នាក់បណ្ឌិត និងអនុបណ្ឌិតចំនួន៣៥រូប ចូលជួបសម្តែងការគួរសម និងទទួលនូវអនុសាសន៍ណែនាំគន្លឹះពីវិស័យទេសចរណ៍ នាថ្ងៃទី០៨ ខែមករា ឆ្នាំ២០២៣ នៅទីស្តីការក្រសួង ដើម្បីត្រៀមខ្លួនទៅសិក្សានិងស្នាក់នៅប្រទេសនូវែលសេឡង់ ចាប់ពីចុងខែមករា ឆ្នាំ២០២៤។

ជាមួយគ្នានេះដែរ ឯកឧត្តមបានចែករំលែកនូវបទពិសោធន៍នៃការសិក្សានៅក្រៅប្រទេស កិច្ចសហប្រតិបត្តិការអន្តរជាតិ ក៏ដូចជាសក្ដានុពលវិស័យទេសចរណ៍កម្ពុជា ជូនដល់ក្រុមសិស្សនិស្សិតអាហារូបករណ៍រដ្ឋាភិបាលនូវែលសេឡង់ខាងលើ ដើម្បីបានជាទុនបន្ថែមក្នុងការពង្រឹងការសិក្សានៅក្រៅប្រទេស និងបានលើកឡើងអំពីយុទ្ធសាស្ត្រអភិវឌ្ឍទេសចរណ៍ និងគំនិតផ្តួចផ្តើម “បង្កើន៥ អភិវឌ្ឍ៣” របស់ក្រសួងទេសចរណ៍។

ទន្ទឹមនឹងនេះ ឯកឧត្តមរដ្ឋមន្ត្រី បានផ្តល់ជាអនុសាសន៍ឱ្យសិស្សនិស្សិតទាំងអស់ត្រូវចងចាំជាផ្នត់គំនិត (Mind-set) នូវចក្ខុវិស័យរបស់រាជរដ្ឋាភិបាលក្នុងការអភិវឌ្ឍកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ហើយត្រូវខិតខំប្រឹងប្រែងរៀនសូត្រ និងអភិវឌ្ឍខ្លួនឱ្យបានល្អប្រសើរ ដើម្បីក្លាយខ្លួនជាយុវជនបន្តវេនដ៏មានថាមពល និងសក្តានុពល ចូលរួមកសាងនិងអភិវឌ្ឍប្រទេសកម្ពុជាក្រោយត្រឡប់ពីការសិក្សានៅប្រទេសនូវែលសេឡង់វិញ។

ក្នុងឱកាសនោះ ឯកឧត្តមរដ្ឋមន្ត្រីបានចូលរួមអបអរសារទរចំពោះសិស្សនិស្សិតជ័យលាភីទាំង៣៥រូប ដែលទទួលបានអាហារករណ៍ថ្នាក់បណ្ឌិត និងអនុបណ្ឌិត ទៅសិក្សានៅប្រទេសនូវែលសេឡង់សម្រាប់ឆ្នាំសិក្សា២០២៤-២០២៥ និងបានវាយតម្លៃខ្ពស់ចំពោះនិស្សិតទាំងអស់ដែលជាកូនខ្មែរអ្នកបន្តវេនដ៏មានសក្តានុពល និងសមត្ថភាពខ្ពស់អាចចាប់យកឱកាសអាហារូបករណ៍របស់រដ្ឋាភិបាលនូវែលសេឡង់ និងបានគូសបញ្ជាក់ថា សិស្សនិស្សិតទាំងអស់នឹងក្លាយជាទូតនាំសារផ្សព្វផ្សាយពីវប្បធម៌ អរិយធម៌ និងសក្តានុពលវិស័យទេសចរណ៍កម្ពុជាលើឆាកអន្តរជាតិ ដូច្នេះសិស្សនិស្សិតទាំងអស់ត្រូវមានទំនាក់ទំនល្អ អត្តចរិតស្លូតបូតរួសរាយរាក់ទាក់ និងចូលរួមថែរក្សាវប្បធម៌ ប្រពៃណី និងមោទនភាពជាខ្មែរអំឡុងពេលស្នាក់នៅ និងសិក្សានៅប្រទេសនូវែលសេឡង់ ជាពិសេសផ្សព្វផ្សាយមោទនភាពជាប្រជាជនខ្មែរ «ប្រទេសតូច បេះដូងទូលាយ» និងនាំសារល្អៗពីកម្ពុជាលើឆាកអន្តរជាតិ។

បើតាមលោក អ៊ី ឆាលី តំណាងនិស្សិតជ័យលាភីអាហារូបករណ៍រដ្ឋាភិបាលនូវែលសេឡង់ សិស្សនិស្សិតជ័យលាភីទទួលបានអាហារូបករណ៍ រួមមាន៖ (១) ការសិក្សាមុនពេលចេញដំណើរ នៅមជ្ឈមណ្ឌលអូស្រ្តាលីសម្រាប់ការបណ្តុះបណ្តាល-ACE (២) សំបុត្រយន្តហោះទៅ-មក (៣) ធានារ៉ាប់រងការធ្វើដំណើរ (៤) ប្រាក់ឧបត្ថម្ភសម្រាប់ Set-up នៅពេលទៅដល់ប្រទេសនូវែលសេឡង់ (៥) ថ្លៃសិក្សានៅប្រទេសនូវែលសេឡង់ ប្រាក់ឧបត្ថម្ភសម្រាប់ការចំណាយស្នាក់នៅ ហូបចុក ធានារ៉ាប់រងសុខភាព ប្រាក់ឧបត្ថម្ភលើការស្រាជ្រាវ និងសរសេរនិក្ខេបបទបញ្ចប់ការសិក្សា។

សូមបញ្ជាក់ថា ចាប់ពីឆ្នាំ២០០៥ រហូតមកដល់បច្ចុប្បន្ន រដ្ឋាភិបាលនូវែលសេឡង់បានផ្តល់អាហារូបករណ៍ដល់និស្សិតកម្ពុជាសរុបជាង៤០០កន្លែងឱ្យទៅបន្តការសិក្សាថ្នាក់ឧត្តមសិក្សា និងក្រោយឧត្តមសិក្សា នៅតាមសាកលវិទ្យាល័យនានានៅប្រទេសនូវែលសេឡង់ ដែលសិស្សនិស្សិតមានសមាសភាពមកពីក្រសួងស្ថាប័នរបស់រដ្ឋាភិបាល អង្គការសង្គមស៊ីវិល និងអង្គការក្រៅរដ្ឋាភិបាល៕