ភ្នំពេញ៖ នាយករដ្ឋមន្រ្តីនៃកម្ពុជា បានបដិសេធចំពោះសំណើររបស់វិស័យឯកជនដែលបានស្នើឲ្យបញ្ចុះតម្លៃ និងលើកលែងទិដ្ឋាការដល់ភ្ញៀវទេសចរអន្តរជាតិ ខណៈសម្តេចលើកឡើងថា តម្លៃថ្លៃនៃការផ្តល់ទិដ្ឋាការមិនមែនជារបាំងបរទេសដែលចង់មកកម្ពុជានោះទេ ហើយមួយវិញទៀតចំណូលតាមរយៈទិដ្ឋាការនេះគឺជាប្រភពចំណូលចម្បងមួយនៃចំណូលមិនមែនសារពើពន្ធនោះ។
ការបដិសេធនេះ ក្នុងឱកាសអញ្ជើញជាអធិបតីភាពបើកវេទិការាជរដ្ឋាភិបាល-ផ្នែកឯកជនលើកទី១៩ នៅវិមានសន្តិភាព នាថ្ងៃទី១៣ ខែវិច្ឆិកា ឆ្នាំ២០២៣នេះ សម្តេចធិបតីនាយករដ្ឋមន្រ្តីបានបញ្ជាក់ថា បរិបទរបស់កម្ពុជាមិនទាន់ដល់ពេលលើកលែងការផ្តល់ទិដ្ឋាការដល់ភ្ញៀវអន្តរជាតិ ដែលចង់មកលេងកម្សាន្តប្រទេសខ្លួននោះទេ ពីព្រោះថា បច្ចុប្បន្ននេះកម្ពុជាពុំទាន់មានប្រភពចំណូលផ្សេងមកប៉ះប៉ូវទំហំចំណូលលើវិស័យមួយនេះ (ការផ្តល់ទិដ្ឋាការ)នៅឡើយទេ។
សម្តេចធិបតី ហ៊ុន ម៉ាណែត បានសង្កត់ធ្ងន់ថា«បញ្ហាទិដ្ឋាការ ខាងវិស័យឯកជនបានស្នើសុំឲ្យពិនិត្យ ពិចារណាលើប្រព័ន្ធទិដ្ឋាការ ដែលមានភាពបត់បែន និងទាក់ទាញសម្រាប់ទីផ្សារ។ សំណូមពរ នេះមិនមែនជាពិធីដោះស្រាយឆ្លើយតបចប់បញ្ហានោះទេ ពីព្រោះថាកម្ពុជាបានកំពុងផ្តល់អនុគ្រោះច្រើន រួចទៅហើយ តាមរយៈការផ្តល់ទិដ្ឋាការពេលមកដល់ និងទិដ្ឋាការអេឡិចត្រូនិច ហើយចំពោះបញ្ហាថ្លៃមិន មែនជារបាំងភ្ញៀវទេសចរមកលេងកម្ពុជានោះឡើយ»។
គួរបញ្ជាក់ថា ការដាក់ស្នើចេញសុំលើកលែងដើម្បីទិដ្ឋាការ គឺហាក់បីដូចជាមិនទាន់ដល់ពេលវេលាដែលកម្ពុជាត្រូវធ្វើនោះទេ។ ផ្ទុយទៅវិញអ្វីដែលកម្ពុជាត្រូវរួមគ្នាធ្វើនាពេលនេះ គឺក្រសួង ស្ថាប័នពាក់ព័ន្ធទាំងអស់ ត្រូវខិតខំប្រឹងប្រែងកែលម្អរ នីតិវិធីសម្រួល និងធ្វើឲ្យប្រសើរឡើងនូវសេវាសាធារណៈ ដើម្បីឲ្យទេសចរណ៍មកកម្ពុជាមានភាពកក់ក្តៅរីករាយ ទាំងពេលមកដល់ ពេលស្នាក់នៅ និងពេលត្រឡប់ទៅវិញជាដើម នេះជាការបញ្ជាក់ របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕
